Romans 3

Anabarka Yahudiyi-bye Nya

1Mi gye ampanyi nza zhin Yahudiyi nyi? Gyiba manayi ho lo n Shekwoyi aba? Ampanyi ho lo n na Yahudiyi kaciya n ɓa zhin nyi? 2E, ampanyi lo n oza ɓa n wo zhin Yahudiyi, Kmisunyi Shekwoyi ɓei gaɓa owo awyidna. (N nabai ɓa kpe, ɓa zhin wo ɓeye). 3Gaiciya azaho n ɓa mi to ɓei n aminci yi n, ntuge ɓa ɓei bma alkawali ya n Shekwoyi yi, kwa wu nu ge Shekwoyi ɓa bma wo alkawaliya? 4Aʼa, ko shi kwo nyi aza vinya n na anyi zhin aza kata nu, Shekwoyi to zhin zakatan nun. Ho pa enya lo n litafi n Zaburada n deye tukwo? Shekwoyi ɓeda ta shan don, ci-ci kwo zhin gaiciya nu. Ko nyikadonu nu na nya ɓa ɓo.

5Ama, azaho ci ge, owo ɓeda n yi to shi bwa nyi n, kwo n na ampanyi yilo, eyi alaifi ku ampanyi zhin, ntu ge aza ɓa gye shi Shekwoyi yeye nyi, esa ɓa gye shi yi zhin aɓe nukwoyi zan. Kwo bmiya lo n wo aba wa tayi, esa ya zhin ɓe nikwoyi, eyi alaifi yi bwa wo go bmazhin? 6Shekwo sauka. Kni Shekwoyi pya nu to woi ta laifin ma? Wo ɓa zun oza kni n wu na? 7Ntuge wota mi wa da mi owa, wa zunmi kni ngye laifi da n, ndei omi tna gaiciya ɓe wolo n mwa-mwayi koi wuge wo zhin gaiciya da nun. 8N ha vi kwo lo nu, ha gye shi yi gna ɓenukwoyi zhin nu dudu. Shekwoyi wa gna kwo ye. Amma aza n ɓa da abeye pya knizun kunce lo n ɓa aba. Dudu lonu aza ho gye ge nya nu n mi zhin waʼazi.

9To, eyi a Yahudiyi du aza je lo? Ko fyewyi, ntuge, yi ku luwu ge aza vinya zhin a laifi danu. Ko a Yahudiyi ko aza nɓa to zhin a Yahjudiyin. 10She littafi a da, za manayi to lo n, zaknayi to lon nna nyimi n wo to zhin laifi danu n.

11Ozato lo n wo vi Shekwoyi zokwo cewo ko n wo n cei pma wa vin.

12Zaho-zahoi la wonya pmiya, aza vinya nku ɓenukwoyi zhin, oza to lo n bwaho n wo zhin ɓe manayi ko zaknayin.

13Oɓa ɓeda tucegye, n ce asin ngye vingwo nkwo gu-guyi ya gni. Oɓa nyitala nu-nuyi n na katayi. Ɓeda doho-dohoyi nɓa da kwo n mwi nukwoyi fi, n kwo ɓa wu oza.

14Oɓa gbe, nu-nuyi n na aknikpe yi n minagyi yi.

15Ba pye-pyeyi n za wu, ɓai wun za nu n wo to gwo ɓa ɓedan.

16Abaho-bahoi n ɓa lo ɓa fa bugba wun n wahala yi n na azhingye yi. 17Ɓa ta kpe enya ye n na yi ge, bugba fun kwo Shekwoyi anabarka m.

18Ɓa ta gye ɓa nuwan n Shekwoyi, kwo enya n wo zhin nubo n ɓa tukwon.

19Ntucenu Shekwoyi minagyi n wagyi tulo mwa n na Yahudiyi, ntu ge oɓa tnu-tnu nu, ɓa shi Shekwoyi awyidna bwa, ɓace ɓai zhin aɓo nukwoyi, zaknayi n ɓami to n na ɓenayi lo lon. Ɓehin-hin anyi vinya to n na gmiba yi lon n Shekwoyi ikoda abyen.

20Nsayi ye, hoku gye? Za to lo n naɓa zewo oza manayi n Shekwoyi abam, ntuge wo zhin ɓo n na awyid-na da m. Ntuge yi kpe Shekwoyi awyidnaye, ya gye to yi gna ɓa bwa shin, owo awyidna wu yi ge, yi zhin aɓe nukwoyi zhin yi nu.

21– 22– 23 ▼

▼The text of verses 21-Rom 3:23 has been merged.

Amma nsayiye Shekwoyi ku eshe zokwo do wuyi, gbo, n na wyidna bwashi yi, amma n zokwo woyi (ko-daya-ke zokwo woyi nu to n, ntu ge Shekwoyi ɓeda ku gna yi tunyi n sapa). Nsaiye Shekwoyi wa gna ge woɓa gwo yi, wa zeyi a tna laifi da. N ya kpema Yesu Kristi wa zo yi a laifi, wa zhin yi gafara. Aɓa gni yi n zokwo deye n ya ɓe Kristi aba. Ko hoi zhin nyika donuʼa, Ko hoya zhin kni laifi nuʼa. Aza vinya nku laifi zhin ɓai ku gba kpekpe-gye n Shekwoyi mwa-mwa aba, 24Ama nsayi yi ku ze aza akni-kni-yi, ntu wo alheli ɓo, nɓa ɓe dna n gni-gni n Yesu Kristi aba nyi. 25Shekwoyi wa tnu n Yesu yi ntu ge, wa ze doshan nya nya ntu oyi alaifi ɓo, ozaho-zahoi nwa ga gaiciya aku gafara zhin wo. Shekwoyi wa shin deye ntu ge wa wu ge wo zhin ɓefyecei nu, nsa avun nya, wo ɓei la bugba bwa n laifi-i, to wa ga aza ta-ta m 26wa zhin deye nsayi ye ntu ge, wa wu ge wo zhin oza kni-kni-yi nu, woi ɓa mi wa gmi oza ya tu nwa ga Yesu gaiciya, wohin ce wa ze oza kni-kni-yi.

27Nyaho lo n zanyikwoci ɓa mwa wohin nkwo ɓo? Nge awo. Ntu kniɓehia? Ntu ge yi shi awyidna bwa? Awo, ama ntu gaiciya ga ɓo. 28Onya gmanyi nu n yi kpe lo, okwo nu ge a ta bwa gni-gni n awyidna bwashi ɓo nu m, ama n gaiciya ga aba. 29Mi nya ge, Shekwoyi zhin Ayahudiyi Shekwoyi nu gmanyi, Wo to zhin abyedo Shekwoyi nu ce n? Cewo wo zhin ɓa nya nu. 30Shekwoyi gmanyi nu, owo nu ɓa gni Ayahudiyi ntu ɓa gaiciya ga ɓo, owo nu-i ɓa gni abyedo, ntu ba gaiciya ga ɓo. 31Shi kwo wu lo nu nyi, ta gye yi ɓa ku awyidna ze gboloyi n? Nge awo, awyidna ze gboloyi n? Nge awo, awyidna nɓa apmayi lo.